S’Acadèmia de su sardu onlus pedit sa coufitzialidade de su logudoresu e de su campidanesu cun s’italianu
S’Acadèmia de su sardu onlus at istèrridu unu comunicadu pro s’introdutzione de sa co-ufitzialidade de su sardu cun s’italianu. O mègius, de «s’introdussione» e de «s’introdusidura». Ca su comunicadu est in tres versiones: italianu, logudoresu e campidanesu. Duncas semus faeddende de sa co-ufitzialidade de custas duas normas e non de una ebbia.
«Pedimus a boghe manna a sos consizeris regionales de calisisat partidu, movimentu e ideologia de fàghere a manera de introduire LUEGO sa co-ufissialidade de sa limba sarda in s’istatudu de autonomia pro chi sa sotziedade sarda bessat bìlingua deaberu e pro chi su sardu potat èssere introduidu a pretzisu comente matèria de imparu curriculare in donzi iscola de donzi òrdine e livellu de s’ìsula e in s’universidade; sa matessi cosa pro su chi pertocat s’aministrassione pùbrica e sas istitussiones sardas. Non faghet prus a andare innantis a progetos e progeteddos. Semus timende chi sa limba sarda s’isperdat in d-unos cantos annos in su benidore e pro custa rejone non podimus e non cherimus prus aisetare. A sa sotziedade sarda l’at istracada custa mancàntzia de respetu pro sos deretos de sos sardòfonos».
«Pedeus a boxi manna a is consilleris regionalis de calisisat partidu, movimentu e ideologia de fai a manera de introdusi LUEGUS sa co-ofitzialidadi de sa lìngua sarda in su statudu de autonomia po chi sa sotziedadi sarda bessat bìlingua diaderus e po chi su sardu potzat essi introdùsiu a pretzisu che a matèria de imparu curriculari in dònnia scola de dònnia òrdini e livellu de s’ìsula e in s’universidadi; sa pròpiu cosa po su chi pertocat s’aministatzioni pùbrica e is istitutzionis sardas. No fait prus a andai ainnantis a progetus e progeteddus. Seus timendi chi sa lìngua sarda si sperdat in d-unus cantu annus in su benidori e po custa arraxoni no podeus e no boleus prus abetai. Sa sotziedadi sarda dd’at arròscïa custa mancàntzia de arrespetu po is deretus de is sardofonus».