Thiniscole, torra abertu s'Ufìtziu de sa limba sarda

Torrant in Thiniscole, e pro totu su territòriu de s’Unione de sos Comunes de su Monte Arvu, sas atividades de s’isportellu linguìsticu pro s’amparu e sa difusione de su sardu. Sos operadores de “s’Ufìtziu” Angelo Canu e Mauro Piredda sunt a disponimentu dae su lunis a sa giòbia dae sas 9 a sa una e mesu in sa sede de s’Unione in Thiniscole (intrende dae carrera de Flumendosa). Custos sos còmpitos issoro: consulèntzias a sa tzitadinàntzia, a sos assòtzios e a sos comitados, interventos de difusione sotziale (dae sas netzessidades de sas famìlias a sa visibilidade pùblica in sos cuntestos urbanos), traballos de tradutzione de atos pùblicos e de testos informales ma de grandu importu pro su territòriu. De prus, luego ant a comintzare sos cursos de limba sarda. Pro cuntatare a sos operadores est possìbile a iscrìere una mail a cultura.unionemontalbo@gmail o a telefonare a su 0784 878648 (internu 5).