Sustegnu a sos pitzinnos de sos detenudos, comintzat su progetu “Liberi dentro per crescere fuori”

Psicòlogos, pedagogistas, educadores e assistentes sotziales in intro de unu modellu de interventu de sa progetatzione familiare partetzipada. Sunt custos sos espertos chi ant a èssere a costàgiu de sos fìgios minores de sos chi sunt in detentzione in intro o in foras d sas domo tzircundariale de Uta. Su progetu “Liberi dentro per crescere fuori”, chi in Sardigna l’ant seletzionadu in riferimentu a su bandu “Liberi di crescere”, at a durare 48 meses cun sas punnas de gherrare contra a istigmas e pregiudìtzios, ofèrrere integratzione sotziale e fàghere crèschere su ligàmene afetivu cun su babbu o sa mama inserrados. A s’initziativa bi pigant parte sas cooperativas sotziales casteddajas Elan (cabu-filera), Exmè, Panta Rei Sardegna, Solidarietà Consorzio, sa domo tzircundariale “Ettore Scalas” de Uta, S'Ufìtziu interdistretuale de esecutzione penale esterna pro sa Sardigna (Uiepe), su servìtziu Polìticas sotziales abitativas e pro sa Salude de su Comune de Casteddu, s’assòtziu Prohairesis e Aragorn S.r.l. Nessi 20 pro cada annu est su nùmeru de pitzinnos chi ant a èssere interessados. Sa punna est sa de aprontare percursos de agiudu pro 30 nùcleos familiares.