Sa de tres Fàulas in archìviu, is de Ans: «Una resessida chèrfida e chircada»

«Prus de 50 voluntàrios, 27 òspites sardos e internatzionales, 15 eventos e prus de 20 atividades cummertziales e produtivas de su territòriu interessadas: sunt unos cantos nùmeros de sa de tres editziones de Fàulas - su festival chi bòrtulat is logos comunes in contu de Sardigna». S’Assemblea natzionale sarda sesta unu bilantzu de s’ùrtima editzione de su fèstivale mentovadu, chi ant fatu custu fine de chida in pessu coladu, dende esempru de comente si ammanìgiat una bona resèssida natzionale.

«Pro duas dies – sighint a nàrrere is de Ans - is bias de Aristanis sunt istadas animadas dae dibatas, mesas tundas, performance artìsticas e ispetàculos musicales. Oto eventos de is chi fiant in calendàriu si sunt tentos in sardu, a dimustratzione de s'importu non petzi de faeddare "de" limba sarda, ma prus a prestu de faeddare "in" limba sarda. Sa sola cosa chi non semus resèssidos a medire, sunt is sentidos e is esperièntzias bìvidas in custas duas dies: disaogu, ispantu, risos, dudas, machines, ditza, iscobertas, cuntentesa, riflessiones, alligria, afetu, passèntzia, aficu, amistade, apartenèntzia, unidade, intentos comunes, ispiratzione, bizzarria, cumpartzimentu e emantzipatzione».

«Amus chircadu – serrant sos voluntàrios - foras dae islogan, de organizare, realizare e bìvere “totus paris”! Custa editzione de Fàulas est istada - ddu podimus nàrrere - una resessida chèrfida e chircada. E su mèritu est totu de s'ispìritu de unione e determinatzione de totus is sòtzios de ANS».