Gianfranco Zola a sa festa de sa chibudda de Bànari
![cipolla banari](/sites/default/files/styles/header_md/public/upload/2024/07/Screenshot%202024-07-14%20at%2018-25-56%20Sagra%20della%20Cipolla%20Dorata%20di%20Banari%20-%20Eventi%20in%20Sardegna.png?h=2fe0d0d5&itok=3R4C6Zvp)
Sa bidda de Bànari est pronta pro un’editzione noa de sa festa de sa chibudda indeorada. S’apuntamentu in sa bidda de su Meilogu est pro sàbadu su 20 e pro domìniga su 21 de custu mese, trìulas.
S’initziativa in onore suo – in intro de su tzircùitu Salude&Trigu de sa Càmera de cummèrtziu de Tàtari – est organizada dae sa Pro Loco in collaboratzione cun su Comune de Bànari cun su patrotzìniu de sa Regione.
Su programma est bastante ricu cun màndigos, essidas peri sos sartos de sa bidda a pee e in mountain bike, laboratòrios culinàrios, presentada de libros e dibatas in contu de massaria e de economia de su logu.
E si s’annu coladu su premiadu fiat su tenore Francesco Demuro, ocannu at a tocare a Gianfranco Zola a retirare su prèmiu de sa chibudda. Su giogadore ulianesu (Nuorese, Torres, Napoli, Parma, Chelsea e Cagliari) at retzire s’òpera aprontada dae s’artista Giuseppe Carta. Su programma intreu in https://www.sagracipollabanari.it/