Su Mori, sa caminera de su laore in su Campidanu de mesu

Su Mori. Est a nàrrere su caminu de su sartu. Est custu su nùmene de s’azienda nàschida su 2018 in Santu ‘Èngiu, in su Murriali, in su Campidanu de Mesu. «Po nosu arrapresentat su caminu chi eus fatu finas a innoi e chi eus detzìdiu de fai cun su molinu cosa nosta», narant sos protagonistas.

Ma custa istòria naschet in antis meda de su batijare ufitziale; naschet cando sos tres, chi como sunt sos assotziados, fiant galu pipios, «candu giogamus me is campus de trigu e me is arrosàias de sa sa sienda de famìllia, ingiriaus de sa natura, de is coloris e de is nuscus de s’ìsula nosta luxenti».

Creschende sos caminos si sunt partzidos unu pagu: Francesco, sessados sos istùdios in architetura s’est dedicadu a s’azienda agrìcula familiare; Marco at sighidu sa caminera manageriale in su campu de su turismu; Samuele at contivigiatu sas connoschèntzias suas de programmadore informàticu. «Pustis seus torraus a is campus po donai vida a una sienda de trasformatzioni de su trigu, de s’arrosu e de s’òrgiu. Is pròpius chi sa sienda de famìllia poniat de sèmpiri, is pròpius manixus chi su logu nostu connoscit de s’antigòriu. De custa manera su lori cosa nosta crescit arrespetendi is mellus pràticas de messarìtzia, de sa traditzioni e cun s’agiudu dèxiu de s’innovatzioni».

A sos tres si b’est agiunta Georgia, esperta de comunicatzione e cun una passione istremenada pro sos produtos e sas traditziones de su territòriu. Sa pedra de su molinu faghet su restu mudende cussu laore in farra e in sìmula dae ue movet sa grandu traditzione culinària nostra.

M.P.