Binnenna 2023: prus pagu àghina ma binu de calidade

Pro more de sa mudada de su clima sa binnenna 2023 at prus pagu àghina, ma bàtidu binu de calidade. Difatis sa produtzione de àghina lompet a -25/30%. A lu sutalineare est s'assòtziu "Coldiretti".

Si in su 2022 in Sardigna sa produtzione de su binu at dèvidu fàghere sos contos cun sa chilighiada, ocannu sunt istadas sa sicagna e sa basca meda a cumandare.

Sa binnenna est giai incumentzada in totu sa Sardigna. A cantu essit a pìgiu dae unu primu iscumbatimentu de "Coldiretti Sardegna"m sa mèngua de sa produtzione de àghina in Sardigna est a inghìriu de su 25-30%. Unu datu, custu, unu pagu prus mannu de su chi at dadu "Ismea", chi pro s'ìsula faeddat de -20%, cun unu passàgiu dae 533milla hl de binu e mustu de su 2022 a 427milla dàbiles de su 2023.