Maturidade 2023, sos argumentos de sa proa de italianu

Aprofundimentu de su mèrcuris - Chi fintzas ocannu sa Sardigna tèngiat sa pertzentuale prus arta de istudiantes no ammìtidos a sos esames est cosa chi amus bidu custu mangianu faghende sa rassigna imprenta (e si sas cosas non mudant est capatze chi fintzas annoas tochet a la bestire custa màllia niedda).

Semper e cando sos esames cherent fatos (ocannu cun sa fòrmula pre-covid) e unu fiotu de pitzocas e de pitzocos sardos, dae sas 8.30 e pro unu màssimu de ses oras, sunt faghende sa prima proa, sa de italianu, in cherta de sos 20 puntos.

Sete sunt sos argumentos chi su ministeru at seletzionadu pro custu primu còmpitu: duas chi pertocant s’anàlisi de su testu; tres pro su testu argumentativu e duas pro sos temas de atualidade.

Sos istudiantes, duncas, s’ant agatadu a Alberto Moravia cun parte de “Gli indifferenti”, cun sos frades Carla e Michele Ardengo cara a sas punnas de s’amante de mama issoro. Unu meledu, duncas, movende dae sa rapresentatzione de su mundu burghesu bidu dae sos ogros de s’autore.

Intre sos sèberos finamentas Salvatore Quasimodo cun “Alla nuova luna”, poesia de su ‘57 chi s’autore dedicheit a su primu bolu de su Sputnik: un’àteru meledu movende dae su comente literadura e progressu s’addòbiant.

Custos sos àteros argumentos: “Elogio dell'attesa nell'era di WhatsApp” dae unu testu di Marco Belpoliti; “L'idea di nazione” movende dae un’iscritu de Federico Chabod; “Dieci cose che ho imparato” de Piero Angela; un’intervista de Oriana Fallaci; una lìtera aberta de s’ex ministru de s’Istrutzione pùblica Patrizio Bianchi chi invitaiat, in tempos de emergèntzia pandèmica, a torrare a pònnere sas proas iscritas in s’esame de maturidade.

«Est unu momentu, custu – at naradu su ministru Giuseppe Valditara –, chi serbit pro unu bilantzu de trèighi annos e chi cheret bìvidu cun serenidade e entusiasmu».