Sa Sardigna in su pòdiu de s'“Ercole Olivario” pro sa de tres bias

Aprofundimentu de su lunis - Sa Sardigna artziat in su pòdiu de s'"Ercole Olivario" pro sa de tres bias, su concursu promotzionadu dae "Unioncamere" e "Camera di Commercio dell'Umbria", lòmpidu ocannu a sa de trintunu editziones.

Su "record" lompet dae Masoni Becciu. Primu postu finas pro s'ògiu San Giuliano.

S'azienda biològica de Biddacidru, ghiada dae Valentina Deidda e Nicola Solinas, conchistat su primu e su de duos postos in sa categoria "extravergine Fruttato medio" cun "Alphabetum", riserva "Ispiritu Sardu", e cun "Cuncordu". Ma no est acabada inoghe, pro ite Deidda batit a domo finas su prèmio "impresa donna".

In sa categoria "Dop/Igp Fruttato Leggero" in cùcuru a sa classìfica b'est, imbetzes, Domenico Manca de S'Alighera cun s'ògiu "San Giuliano Sardegna DOP". Galu, tra sos mentovos de mèritu "Giovane imprenditore" b'at s'azienda agrìcula Giacomo Nieddu.

Sas propostas de Masoni Becciu, conchistant su paladu de sos mègius "chef" de Itàlia.

Cun 62 ètaros de matas de olia e una produtzione de 35milla ampullas pagos prus o mancu a s'annu, sa de Masoni Becciu est una de sas realidades produtivas de Sardigna premiadas de prus in su mundu.

Su prèmiu, sos Masoni Becciu, lu dèdicant a su fìgiu e a totus sos pitzocos de Sardigna "a tales chi - acrarant a ANSA - posant printzipiare su bisu de coltivare sa terra cun s'augùriu de collire sas soddisfatziones nostras".

Su prèmiu batitu a domo dae Perugia pro Masoni Becciu lompet a pustis de su prèmiu leadu in su "Sol" de Verona pro su "miglior olio Bio al Mondo", e apustis finas de su primu prèmiu assolutu comente ògiu mègius de Itàlia "Gambero Rosso" e, galu, primu prèmiu "best new Eqoo" in su prèmiu "Il Magnifico" de Firentze.

"S'ògiu de Sardigna- sutalìneat a ANSA su presidente de 'Coldiretti Sardegna' Battista Cualbu e su diretore Luca Saba - si distinghet semper in sos cuncursos mègius" e lu faghet " cun ògiu de calidade manna gràtzias aziendas chi ant ischidu innovare fadende atentzione a sa sustenibilidade".