Sos binos sardos premiados dae sa "Guida Oro I Vini di Veronelli 2023"

In sa Mesa - Su sole, comente s'ischit, est unu reconnoschimentu istòricu fìgiu de su prèmiu chi Luigi Veronelli, babbu mannu de sa crìtica enogastronòmica italiana, atribuiat a unos cantos binos tastados in s'ìnteri de s'annu. Faeddamus de binos chi, comente si podet immaginare, fiant istados de gradimentu a su paladu de su criticu etotu.

Ma pro ite oe faeddamus de custu reconnoschimentu? Sa resone est sèmplitze: pro ite ocannu est istada presentada s'editzione 2023 de sa "Guida Oro I Vini di Veronelli", un'òpera chi est realizada paris cun su FAI ("Fondo per l'Ambiente Italiano"), una ghia de sos binos de Italia in ue si contant sa bellesa de 2.104  produtores e de 16.625 binos de primore. Sempermai, in sas pàginas de custa ghia finas sa Sardigna faghet sa figura sua. E tando la depimus contare in custa rubrica chi pertocat a unu setore, su de s'enogastronomia de s'ìsula nostra, chi rapresentat una prenda importante de sas produtziones sardas.
Tocat a sutalineare ca sunt 436 in totu sos binos italianos premiados dae sa ghia cun sas "Tre Stelle Oro", su marcu chi est atribuidu a sas ampuddas chi ant otentu unu puntègiu mìnimu de 94/100; 26 sunt sas bèvidas chi ant àpidu su reconnoschimentu "Grandi Esordi" e 10 sos binos chi ant otentu su "Sole", est a nàrrere su prèmiu ispetziale atribuidu dae sa Redatzione. In fines, a 5 binos est istadu atribuidu su reconnoschimentu "Miglior Assaggio".

Sos tres isteddos, est a nàrrere su reconnoschimentu prus importante de sa ghia, l'ant otentu finas noe cantinas de Sardigna. Sos binos premiados sunt: su binu "Angialis -- Isola dei Nuraghi 2017", su "Turriga - Isola dei Nuraghi 2017" e su Cannonau di Sardegna Riserva Senes 2018", tres ampuddas produidas dae sa Cantina Argiolas de Serdiana. Tra sos binos premiados agatamus finas: su "Cannonau Riserva Kuèntu 2017" de sa Cantina Atha Ruja de Durgàli; su "Carignano del Sulcis Superiore - Terre Brune 2018" e su "Latinia 2017" de sa Cantina Santadi; s"Isola dei Nuraghi Bianco Santigaìni 2019" de sa Cantina Caphichera, realidade chi at domo in Terranoa; sa "Vernaccia di Oristano Antico Gregori 1979" e sa "Vernaccia di Oristano -- Riserva 1997", duos binos produidos dae sa cantina Contini.

No est totu, pro ite sa Sardigna otenet finas unu "Sole", chi est istadu atribuidu a su "Carignano del Sulcis -- Riserva Santomoro", unu produtu de sa Cantina "Vigne Bentasali" de Sant'Antiogu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22