Sustenibilidadi: in Sardigna nascit su mercau de mari chi castiat a s'ambienti
Terra - In Sardigna nascit unu mercau de mari chi castiat a s'ambienti. Su progetu est promòviu de su “FLAG Sardegna Sud Occidentale”. Sa punna sua est de mandai ainnantis una pisca sustenìbili.
Su mercau de su pisci promòviu de su “FLAG Sardegna Sud Occidentale” est unu progetu de bèndida direta de pisci. A ddu bèndiri ant èssiri is impresas de àcuacoltura de su territòriu de su FLAG.
Su progetu nàsciu de sa conca de su “FLAG Sardegna Sud Occidentale” fait parti de is fainas incarreraras in su territòriu po promòviri sa pisca sustenìbili, po amparai is ratzas de pisci chi s'agatant inguinis e po promòviri e amparai sa bèndida direta de su piscau.
Agoa de ai traballau cun is iscolas, cun is operadoris de su cumpartu e cun su mundu de sa circa, su “FLAG Sardegna Sud Occidentale” fait duncas unu passu prus mannu e fait nàsciri su mercau de mari sustenìbili po sa zona de cumpetènzia cosa sua. Chistionaus de unu mercau chi offerit pisci friscu a KM zeru e chi tenit sa punna de agiudai sa connoscèntzia de sa promotzioni de su pisci de su territòriu e po finas sa connoscèntzia de su traballu de su piscadori comenti bardianu de su mari.
In su trassintru de su progetu, s'iscuadra ghiada de su “FLAG” at iscritu unu documentu de importu mannu cun s'agiudu de sotziedadi “Interforum” e cun is piscadoris e is àcuacoltoris de su territòriu. Est sa “Carta del mercato”, unu disciplinari innoia si podit agatai is valoris e is printzìpius chi donant is règulas a su mercau etotu. Sa “Carta del mercato” est istètia sutascrita de totus is operadoris econòmicus chi ant pigau parti a su progetu.
Su progetu de su mercau at aprontau giai unus cantu atopus. Is atopus chi ant a benni s'ant a isboddiai mèrculis 22 de mesi de idas de su 2021 e mèrculis 29 de mesi de idas de su 2021. Is atopus ant èssiri sèmpiri de is 8.00 de mengianu fintzas a sa una. Chi su tempus est malu s'ata a podi cambiai data.
Po ndi sciri de prus tocat a intrai in s'indiritzu web www.ilmercatodelmare.it o in sa pàgini Facebook de su progetu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
