Sostenibilidadi: in Nùgoro is bincidoris de "Ricicliadi - Campioni di buone pratiche"
Terra - Sustenibilidadi e iscola. Nùgoro premiat is classis chi ant pigau parti a sa primu editzioni de "Ricicliadi - Campioni di buone pratiche". A is classis bincidoras est istètia donada una targa e unus cantu matas de tzìpiri e de muta. Is matas ant èssiri prantadas in su giardinu de iscola.
A donai su prèmiu a is istudiantis est istètiu su Comunu de Nùgoro, chi est s'aprontadori e su promovidori de su cuncursu. Impari a su Comunu in cust'atopu de educatzioni ambientali nci fiant puru sa sotziedadi "È-comune" e su Ceas, est a nai su "Centro di educazione ambientale e sostenibilità".
A cunsignai su prèmiu a is piciocus funt istètius su visu sìndigu Fabrizio Beccu, s'Assessora de s'Ambienti Valeria Romagna, s'amministradori de "È-Comune" Paolo Tuffu, su diretori tècnicu de sa sotziedadi Francesco Serra e su responsàbili de su Ceas Gianluca Cacciotto.
Sa manifestada at tentu comenti tema ùnicu su riciclu e sa sustenibilidadi ambientali. A ingìriu de custu tema s'est isboddiau su traballu de is istudiantis, trisinaus in laboratòrius de riusu creativu, documentàrius, mustras e mamentus de istùdiu cun professioneris de su cumpartu.
In sa categoria "Scultura" funt lòmpius a su primu postu is istudiantis de is classis prima e seguda de su litzeu artìsticu "Ciusa". In sa categoria "Video e immagini" is bincidoris funt istètius is piciocus de s'indiritzu "Relazioni internazionali e marketing" de s'ITC "Chironi".
Agoa de ai torrau gràtzias a is istudiantis chi ant pigau parti a sa manifestada, s'Assessora Romagna at sutalineau ca "Ricicliadi" s'at a torrai a fai s'annu chi benit puru. Po Romagna, difatis, est de importu mannu a trisinai is iscolas in manifestadas aprontadas a ingìriu de temas fabbricaus asuba de argumentus dìligus comenti sa sustenibilidadi e s'ambienti". Sendu custus temas de fundamentu po su benidori, po is aprontadoris de "Ricicliadi - Campioni di buone pratiche" est essentziali chi is piciocus siant informaus e trisinaus aintru de s'argumentu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
