Sa RAS at a finantziai s'amparu e s'avaloramentu de is giassus chi faint parti de sa “Rete Natura 2000”
Terra – 730milla eurus est su dinai chi s'Assessorau de “Sa Defensa de s'Ambiente” de sa Regione Autònoma de Sardigna at a finantziai po s'amparu e s'avaloramentu de is giassus chi faint parti de sa “Rete Natura 2000”.
In diri de oi, difatis, s'Assessori Gianni Lampis at declarau ca sa Giunta Regionali at aprovau sa delibbera chi at a finantziai 610milla eurus po is fainas de istùdiu e osservatzioni de fai in dogna habitat chi fait parti de is giassus de sa “Rete Natura 2000”.
A custa suma s'aciungint àterus 120milla eurus. Dinai, custu, chi at a andai a is Comunus de Terraba (60milla eurus) e de Gèsturi (àterus 60milla eurus). Custa suma at a serbiri po is ispesas de gestioni chi funt acapiadas a is giassus etotu e po finas a mandai ainnantis circas de importu chi ant èssiri de utilidadi po unu benidori chi olit donai vida a duus parcus naturalis regionalis: unu in territòriu de Terraba e unu in territòriu de Gèsturi. Custus parcus ant a podi rapresentai duas prendas ambientalis de importu po sa Sardigna.
Bisòngiat perou a sutalineai ca custa dispositzioni ufitziali pertocat unu progetu prus mannu. Seus fueddendi de unu programma de amparu chi tenit po protagonista s'ambienti naturali e tenit po finas sa punna de afortiai sa “Rete Ecologica Regionale”. De custa retza faint parti pròpiu is giassus de sa “Rete Natura 2000” (Sic, Zps, Zsc). S'obietivu prus importanti de custu traballu, tocat a ddu pretzisai, est s'avaloramentu de sa biodiversidadi. E difatis, s'atividadi de osservatzioni de is habitat naturalis at a serbiri a ponni manu pròpiu a cust'avaloramentu.
In Sardigna funt 128 is giassus chi faint parti de sa retza “Natura 2000”; funt areas naturalis innoi s'agatant ratzas animalis e vegetalis chi in diri de oi funt raras meda. Calicuna, difatis, bivit feti in Sardigna, comenti is “Speleomantes genei”, is “Speleomantes supramontis”, is “Speleomantes sarrabusensis”, is “Speleomantes flavus” e is “Speleomantes imperialis”.
A.C.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
