Sa sustenibilidadi in coxina: su ristoranti "Fradis Minoris"
Terra - In su ristoranti “Fradis Minoris” de Nora, sa fantasia e sa sustenibilidadi funt is primus ingredientis de menu lichitus e chi fueddant de Sardigna.
Sa coxina de su chef de “Fradis Minoris” est una coxina nuscosa chi contat de piscis, erbas, pallamarinis e birdura. Seus fueddendi de una coxina chi cun professionalidadi impreat ingredientis a chilòmetru zeru, duncas ingredientis chi non faint unu biàgiu longu po arribai a is forreddus de su ristoranti.
Tocat a nai puru ca su ristoranti “Fradis Minoris” s'agatat in nd'unu àrea naturali ùnica: sa Laguna de Nora, in sa Sardigna de su cabu de giossu. Est pròpiu sa laguna chi fait donu a su ristoranti de una matèria primàrgia pretziosa. Difatis, in sa Laguna de Nora s'àcua druci de su frùmmini s'atobiat e s'ammisturat cun s'àcua salida de su mari formendi un'ecusistema naturali innoia bivint piscis e pillonis e innoia crescint erbas e pallamarinis chi s'iscerant po nuscu e sabori. Aici dògnia produtu est un'ingredienti ispetziali.
Cun “Fradis Minoris”, duncas, sa cosa de papai si cojat cun s'ambienti innoia s'agatat. Po lòmpiri a su ristoranti tocat a lassai sa màchina a faci de sa cresiedda de su XII sèculu dedicada a Sant'Efis e si passilat atressu de unu tretu de terra longu 400 metrus pagu prus o mancu. Est unu tretu de terra chi tenit a sa manca sua su mari e a sa dereta sa laguna. Una caminera cun nd'unu panorama mirìficu innoia s'ogu podit gosai de sa bellesa de is bàngius e de is coròdulas de is domus de sa Nora antiga, mentras su nasu si prenit de su nuscu salàmastru de su mari e de sa vegetatzioni aresti tìpica de sa laguna e s'origa si santziat cun is "boxis" de is pillonis.
Su menu de “Fradis Minoris” nascit candu su piscadori Màriu furriat a domu cun sa barca sua. Su piscadori de sa laguna de Nora traballat respetendi su ciclu naturali de is piscis. Ma no est totu, poita cun su ristoranti “Fradis Minoris” sa sustenibilidadi de sa coxina s'agatat puru in trastus chi dd'alasciant. Is trastus isceraus funt ecusostenibilis e funt fatus cun materiali riciclabilis.
