“Herb Sardinia®”: una realidadi sustenìbili chi fait produtus po sa bellesa de sa faci e de sa carena
Terra - Su nòmini cosa sua est “Herb Sardinia®” e est una realidadi casteddaia de interessu mannu po is chistionis chi pertocant a su tema de sa sustenibilidadi. Comenti si ligit in su giassu de s'azienda etotu, in is duus fueddus “Herb Sardinia®” si aunint duas cosas: is màginis de is erbas sardas cun is nuscus insoru e sa Sardigna etotu.
“Herb Sardinia®”, difatis, est un'azienda chi fait unus cantu produtus naturalis po sa bellesa de sa faci e de sa carena. Funt totus produtus cun nd'unu tzertificau biològicu: s'azienda de Casteddu ddus faidi impitendi feti matèrias primàrgias biològicas chi crescint in s'ìsula nostra.
Aici, su marcu “Herb Sardinia®” bantat puru su tzertificau de s'AIAB, est a nai de s' “Associazione Italiana Agricoltura Biologica” o, po ddu nai in sardu, de s'asòtziu italianu de massaria biològica.
Bisòngiat a pretzisai po finas ca custa realidadi traballat impitenti feti tènnicas modernas e noas e ca est lòmpia a otèniri is resurtus de importu mannu chi eus nau poita primu at istudiau is erbas e is matas de Sardigna circhendi de ndi cumprendi is benefìtzius.
Po fai is produtus cun marcu “Herb Sardinia®” s'isceberant is nuscus e is erbas mellus de s'ìsula. Intre custas si podint arregodai assumancu sa muta, s'archimissa, su modditzi e sa sàlvia, est a nai unas cantu erbas chi faint beni a sa peddi. Su frutu de custa produtzioni chi impreat feti tennicas modernas funt produtus naturalis centu po centu, produtus chi podint bantai una calidadi arta meda.
Ma no est totu. Difatis, dògnia produtu cun eticheta “Herb Sardinia®” non tenit: SLS o SLES, parabenis, coloris e nuscus artifitzialis, conservantis o cosas noxilis po sa saludi de s'òmini. In prus, tocat a sutalineai puru ca totu sa produtzioni si fait respetendi s'ambienti.
Infinis, comenti si podit ligi in su giassu cosa sua, in s'azienda casteddaia traballat feti genti sarda e su dinai chi est istètiu impitau po dda criai est sardu etotu.
