Su “Festival dello Sviluppo Sostenibile” atobiat in Sardigna
Terra - Ddoi at èssiri sa Sardigna puru intre is logus chi ant a aghilliri su “Festival dello Sviluppo Sostenibile”. Una manifestada de importu mannu chi, comenti narat su nòmini cosa sua, pertocat su tema de sa sustenibilidadi e interessat totu su territòriu de s'istadu italianu.
Cumintzada su 21 de su mesi de cabudanni passau, sa manifestada previdit po finas trinta atopus in s'isula nostra. Difatis, su 21 de cabudanni etotu su “Festival” at atobiau in Sardigna cun “A Terra e in Mare c'è spazio per tutti”, un'atopu chi s'isboddiat in dexi diris, chi tenit domu in S'Alighera e rapresentat una proposta de s'assòtziu “Vela insieme”, nàsciu in su 1996 comenti iscola de mari oberta a totus.
Ma ita est “A Terra e in Mare c'è spazio per tutti”? Simpli: est una manifestada de mari fata po fai connòsciri su mari a is prus giòvunus. Una manifestada chi s'at a tenni fintzas a su 30 de su mesi de cabudanni e chi rapresentat un'ocasioni de importu mannu, poita offerit sa possibilidadi a is piciocheddus e is pichiocus chi tenint un'edadi chi andat de is catòdixi a bint'annus de si mudai in protagonistas de unu giru in barca. Sa punna? Sa de ddi fai apretziai s'ambienti de su mari de su territòriu sardu.
No est totu. Difatis tocat po finas a sutalineai ca s'asòtziu “Vela insieme” at aprontau “A Terra e in Mare c'è spazio per tutti” impari cun s'”Assessoradu de sa defensa de s'ambiente” de sa “Regione Autònoma de Sardigna”, ma puru cun s'agiudu de su “Ceas Porto Conte - Centro di educazione alla sostenibilità” de su “Parco di Porto Conte” e de s' “Amp Capo caccia Isola Piana”.
Sa sustenibilidadi comenti tema chi pertocat s'ambienti, s'economia e sa sotziedadi at a atobiai ancora in Sardigna cun unus cantu atopus chi ant èssiri aprontaus de sugetus publicus e privaus puru. Comenti si podit lìgiri in su giassu de sa “Regione Autònoma de Sardigna”, difatis, is manifestadas sardas ant a sighiri fintzas a su 24 de su mesi de ledàmini 2021.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
