D.L. n. 111 de su 6 de su mesi de austu 2021: sa contrariedadi de Caminera Noa e de Cobas Scuola Sardegna

Non funt medas is boxis chi si ndi funt pesadas a faci de su determinu pigau de su Guvernu italianu de fai intrai su green pass firmendi is traballadoris, comenti est acontèssiu unus cantu diris fait in s'ispidali Brotzu de Casteddu, logu innoia is carabineris lamaus de sa diretzioni ant istresiau una traballadora chi non teniàt su green pass.

Agoa de custa acontèssia s'azienda at iscritu 57 lìteras po firmai àterus traballadoris intre is chi non si olint vacinai e po finas intre is chi no olint impreai su green pass.

"Is media - sutalìneat Caminera Noa - si faint sciri ca funt pagu prus o mancu de 750 is traballadoris de sa sanidadi chi no ant a ammostai su green pass". No est totu, poita a is traballadoris de sa sanidadi bisòngiat aciungi - comenti pretzisat Caminera Noa etotu - "unu nùmeru mannu de professoris de s'iscola e de traballadoris ATA" chi andant a pintai unu cùadru de crisi econòmica chi at a sighiri a fai dannus mannus in Sardigna.

A difèndiri is traballadoris de s'iscola nci funt is Cobas Scuola Sardegna puru, chi cun nd'una nota de imprenta pretzisant ca is determinus pigaus de su Governu Draghi cun D.L. n. 111 de su 6 de su mesi de austu 2021, "funt unu TSO contra a una categoria de traballadoras e traballadoris chi in diri de oi funt vìtimas [...] e non po mori de s'impestu".

Nimancu sa solutzioni de fai fai su tamponi molecolari a is professoris e a is ATA dògnia 48 oras ponit diacordiu is Cobas Scuola Sardegna cun su Guvernu. Cun custa solutzioni, difatis, is traballadoris de s'iscola ant a depi fai un'ispesa tropu manna po is busciacas insoru. Est un'ispesa chi si podit arresparmiai fadendiddi fai is "test de sa salia a indonu". "Test – acrarant is Cobas Sardegna - chi si podint fai cantacanta".

A afortiai su chi narat su sindacau ddoi est sa boxi de Caminera Noa, chi pretzisat ca "is chi non si vacinant non andant contra a sa lei ma si serbint de unu diritu insoru".