Sustenibilidadi: s'Alighera e sa Social Innovation School
Terra - Nascint in s'Alighera e rapresentat un'idea noa de isvilupu, un'isvilupu chi imbrassat sa sustenibilidadi. S'idea est filla de sa conca de unu grupu de giòvanus chi faint parti de s'assòtziu Rumundu. Est un'idea chi afungat is arrexinis suas in sa coperatzioni, in s'innovatzioni, in s'impresa sotziali e in sa sustenibilidadi. S'”hub” de custa idea est sa Sardigna, e prus a notu est s'Alighera, innoja s'assòtziu at postu in pei una “Social Innovation School”, est a nai un'iscola internatzionali po innovadoris sotzialis. Ma no est totu, poita is de Rumundu in prus de sa “Social Innovation School” ant postu in pei un'”Academy” puru. Custas duas realidadis traballant po agiudai is giòvanus a pentzai a modellus nous de isvilupu territoriali.
Fai impresa po fai crèsciri su territòriu olit puru nai a dda fai chistionai cun nd'una classi dirigenti capassa de nd'ascurtai is bisòngius e is progetus. Po is giòvanus de Rumundu, difatis, feti traballendi in custa manera si podit fabbricai sa Sardigna de su benidori.
Su de Rumundu, duncas, est unu caminu de "alta formazione" chi tenit sa punna de torrai a aprontai is organizatzionis cun protzessus chi tenint a coru sa filosofia de sa sustenibilidadi, agiudendi is chi ndi faint parti a èssiri leader chi traballant cun responsabilidadi e atinamentu.
In pagus fueddus, su de s'innovatzioni sotziali at èssiri su nuu de unu caminu de imparu chi si fundat asuba de is modellus de isvilupu, asuba de fainas individualis e asuba de grupus de traballu. Unu caminu de imparu chi impitat mètidus de fatzilizatzioni, de atzelerada e de detzeleratzioni.
Chini at a pigai parti a is letzionis at èssiri trisinau in atividadis pràtigas e letzionis in àula. Ma non est acabada innoi, poita po lòmpiri a is obbietivus comunus, dògnia personi at a dèpiri traballai puru in grupixeddus chi tenint sa punna de favorèssiri sa cuncàmbia cun is collegas e s'afortiamentu de sa responsabilidadi individuali.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
