"Sardegna Green": su progetu totu dedicau a sa sustenibilidadi in Sardigna
Terra - “Sardegna Green” rapresentat unu progetu chi est totu dedicau a sa sustenibilidadi. Sa punna sua est de fai connòsciri a dogna personi, e prusatotu a is prus giovuneddus, is argumentus chi pertocant a sa sustenibilidadi.
“Sardegna Green”, perou, est meda prus de cussu chi eus giai nau, poita rapresentat unu progetu chi podit serbiri cummenti trastu ùtili a is aziendas de isvilupu e turismu sustenìbili, a cussas chi produint energias rennovàbbilis e a is realidadis de su mundu bio.
“Sardegna Green”, difatis, est unu progetu ùtili po pòniri in cuntatu is diversas realidadis sustenìbilis, po ndi valorizai is produtus, po ddas agiudai in sa comunicatzioni cun s'amministratzioni pùbbrica.
Non funt cosas de pagu contu, antzis: funt cosas chi si faint sutalineai ca custu est unu progetu chi tenit unu valori de importu mannu.
In d'unu momentu de crisi mundiali cummenti cussu chi seus bivendi de dexi annus pagu prus o mancu, su camminu de sa sustenibilidadi e de su mundu bio est cussu sceberau de aziendas meda; po finas in Sardigna ddoi at interessu a custu tipu de progetus. Custu mancai s'ìsula nostra, intre is regionis de s'istadu italianu, “siat sètzia” in d'una positzioni bàscia meda po cantu pertocat s'impenditorialidadi bio. A si ddu nai est s' “Indice Green Economy 2012” de “Fondazione Impresa”. Epuru – cummenti si podit lìgiri in su giassu “Sardegna Green – Isola sostenibile”, funt medas is realidadis produtivas sardas chi funt castiendi a modellus de produtzioni sustenìbili e ant amostau interessu po un'àteru tipu de economia e po consumus difarentis.
S'obietivu prus importanti de “Sardegna Green” est su de trabballai po fai intrai sa sustenibilidadi in sa vida de dogna diri de sa genti, est a nai ca is fainas postas in pei de custu progetu tratant custu tema cummenti una cosa normali, aici is personis pigant parti a unu progetu chentza de si ndi agatai.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
