Nascit “Sardegna Bio”: unu progetu de importu in su campu de sa sustenibilidadi
Terra - Est una vitòria de importu mannu po totu sa Sardigna. Seus fueddendi de sa nàscida in s'ìsula de unu “distretu bio”, chi tenit sa punna de èssiri su prus mannu aintru de su territòriu de s'istadu italianu. Unu risurtau istòricu chi pertocat a sa sustenibilidadi.
Su nòmini cosa sua est “Sardegna Bio”, tenit s'arreconnoscimentu de s'Assessorau a sa Massaria de Regione Autònoma de Sardigna e at biu sa luxi ses mesis a oi. Is nùmerus suus funt giai importantis meda, poita in diri de oi custa realidadi contat prus de centu sòtzius chi dda sighint passu passu e cun interessu mannu.
Su Presidenti de “Sardegna Bio”, Andrea Campurra, chistionat de custu distretu cummenti de unu trastu chi at a serbiri a is realidadis chi traballant in su campu biològicu in Sardigna cummenti aneddu po ddas uniri e po traballai impari. Custu, perou, at a podi po finas èssiri unu trastu de impreai po otèniri finantziamentus.
Ma cali funt is nùmerus de sa coltivatzioni biològica in s'ìsula? A si ddu nai est un'anàlisi fata de Coldiretti in s'annu 2019. Est un'anàlisi chi chistionat de centu-bintimilla ètarus coltivaus a biològicu in totu sa Sardigna. Custu est unu datu de interessu mannu, poita gràtzias a datus aici sa Sardigna est lòmpia a èssiri tra is primus regionis de sa classìfica italiana po su biològicu.
Ma non est totu, poita Coldiretti, gràtzias a s'analisi cosa sua, si narat meda de prus de custu. Podeus fai un'esèmpiu e nai ca is aziendas impignadas in su biològicu in s'ìsula funt duamilla pagu prus o mancu. Duncas, sa coltivatzioni chi pentzat a su respetu de s'ambienti est una realidadi chi podit tenni unu benidori. Totu est a ddu fabbricai fadendi is cosas giustas e sighendi unu progetu ladinu. Est cantu est faendi propiu “Sardegna Bio”, chi at a po finas fai contu de una sensibbilidadi “green” noa chi est arribbada a pustis de su covid-19.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
