“Leggere il giornalismo”: su cursu online cun istudiosus famaus in su campu de sa comunicatzioni

Su tìtulu cosa sua est “Leggere il giornalismo” e est unu cursu chi previdit 6 atopus chi s'ant a tenni online. Dogna atòbiu at a durai duas oras.

Sa punna de su cursu est sa de donai a sa genti calincunu trastu in prus po lìgiri a manera giuditziosa is novas in is giornalis.

Is argumentus chi ant èssiri afrontaus funt de importu mannu. Intre custus: is fake news e sa libbertadi de imprenta.

Su cursu, chi est ghiau de Francesco Putzu, previdit sa partetzipatzioni de istudiosus famaus in su mundu de sa comunicatzioni: is giornalistas Giovanni Zagni, Fabio Chiusi e Leonardo Bianchi, s'istòrica Simonetta Segenni e su filòsofu Adriano Ercolani.

Su primu de is atopus s'at a tenni su 5 de maju 2021 a is 18.00. Ant a sighiri is atòbius de su 10 de maju a is 19.00, su de su 13 a is 18.00, su de su 17 a is 19.00, s'atopu de su 20 ai 18.00 e su de su 24 a is 19.00.

Su cursu fait parti de unu progetu prus mannu, “Biblioteca una risorsa per la comunità”, chi est finantziau de sa Fondazione con il Sud. Pigant parti a “Biblioteca una risorsa per la comunità” su “Centro per il Libro e la lettura”, sa “Cooperativa Studio e Progetto 2”, su comunu de Aristanis, Su comunu de Santa Justa e sa “Fondazione Oristano”.