Is fainas sustenìbilis de sa “Scuola della Terra in Sardegna”

Terra - Esistit de una pariga de annus, est una realidadi ativa in su campu de sa sustenibilidadi e su nòmini cosa sua est “Scuola della Terra in Sardegna”.

Su diretori iscientìficu est Fabio Parascandolo, unu giògrafu e professori de s'Universidadi de is Istùdius de Casteddu.

A cantu parrit, mancu su covid-19 at frimmau su determinu e sa gana de andai ainnantis chi movit custa realidadi. Difatis, in sa primu pàgini de su giassu de sa “Scuola della Terra in Sardegna” si podit lìgiri ca cras, 14 de maju de su 2021, a is 18.00 s'at a tenni un'atopu online po su “FFP”, cussu chi totus connosceus cun su nòmini ingresu de “Friday For Present”: Daniela Poli, urbanista e professora universitària at a chistionai de arragus ecològicus.

Bisòngiat a sutalineai ca cust'atòbiu est feti unu de is medas fatus in custu momentu aici difìcili e dilicau po s'istòria de totu s'umanidadi.

Ma cali funt is argumentus de importu chi funt in su coru de custa realidadi de istùdiu, circa e spaniadura nàscia e crèscia in Sardigna e famada in continenti? Aintru de sa “Scuola della Terra in Sardegna”, unu de is temas de punta est sa retza de sa vida de sa Terra, cun is annoditzus de is protzessus naturalis, culturalis e sotzialis puru. Is de s'iscola ant detzìdiu de afrontai custus temas oberrendi is ennas a espertus de unas cantu matèrias. Tocat a pretzisai, duncas, ca custa est una richesa manna poita permitit unu cunfrontu intre visionis difarentis.

Ma cali est sa punna de custa realidadi? Simpli: est sa tutela de is benis comunus naturalis, benis chi funt essentzialis po sa vida de totus. Custu est un'argumentu de importu, unu tema chi si depit sboddiai cun atentzioni a sa sustenibilidadi.

Po is de s'iscola est ladinu ca sa Terra rapresentat su logu innoia biveus, ma po finas unu logu innoia s'agatant is resursas chi serbint a totus po campai.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22