Una festa po su benidori: s'Earth Day
Terra - Su 22 de su mesi de arbili sa Sardigna puru afestat s'Earth Day, est a nai “ sa diri de sa Terra”, una diri chi promovit sa sustenibilidadi po mellorai su tempus benidori.
Po s'editzioni de su 2021, “Sardegna Arpa - Agentzia Regionale po s'amparu de s'ambiente de Sardigna”, aprontat una fibera de labboratòrius online dedicaus is piciocheddus de iscola. Is labboratòrius ant a cumentzai oi, 20 de arbili de su 2021 e ant a acabbai giòbia 22 de arbili.
Sa punna est sa de prevèniri is destrossas chi podint acuntèssiri po mori de su cambiamentu de su clima e de su sciàsciu ambientali.
Ma ita est “sa diri de sa Terra”? Est una manifestada nàscia in su 1970 in is Istadus Unius de Amèrica po promòviri sa cuscèntzia ambientali intre sa comunidadi de is tzitadinus. Cummenti ddu faint? Circhendi de ddis imparai su respetu po su logu innoia biveus. De candu est nàscia sa “diri de sa Terra” trisinat unu milliardu de personis pagu prus o mancu. Ddu fait atressu de unas cantu initziativas chi tenint cummenti protagonistas duxentus paisus in su totu su mundu.
Cummenti est acuntèssiu s'annu passau etotu, ocannu puru is dipartimentus e is istruturas de “Sardegna Arpa” ant a abarrai serraus po mori de su covid-19. Primu de custa pistulèntzia, difatis, is istudiantis de totus is iscolas podiant bisitai s'agentzia chi est sa bardiana de s'ambienti de Regione Autònoma de Sardigna. In diri de oi, perou, s'apretu ambientali est malu meda, duncas s'Arpas at detzìdiu de atopai is iscolas a manera difarenti. Dd'at a fai online cun cincu labboratòrius, chi s'ant a sboddiai asuba de is temas prus importantis de s'Earth Day 2021, est a nai: is 5R de sa plàstica; sa resta de s'àcua; is cambiamentus de su clima e s'isvilupu sustenìbili, s'aliga chi s'agatat in s'arenàrgiu e sa cuscèntzia ambientali.
Po ndi sciri de prus si podit incracai innoi.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
