"Time in Jazz" e "Musica sulle Bocche" aintru de su "Jazz Takes The Green"

Terra - Est de oi, 13 de su mesi de fiàrgiu de su 2021, sa nota de imprenta chi fait isciri a totus is giornalis ca "Time in Jazz" e "Musica sulle Bocche" pigant parti a "Jazz Takes The Green", sa retza de festival chi tenit comenti bandera sa sustenibilidadi.

De oi, duncas, su festival nàsciu in su 1988 in Belchìdda de sa conca de Paolo Fresu e s'atòbiu musicali aprontau de s'assòtziu Jana Project e ghiau de Enzo Favata, tenint un'àtera punna puru: s'impignu sotziali po s'ecologia.

Sa retza "Jazz Takes The Green" contat 17 festival, totus atòbius de importu mannu in su mundu de sa mùsica. Una retza de 17 festival po 11 regionis italianas chi tenint in su coru sa saludi de sa Terra.

S'idea chi at donau vida a "Jazz Takes The Green" est ca sa mùsica jazz depit sighiri su caminu suu ammostendi s'impignu sotziali chi dd'at animada sèmpiri. Po custa rexoni dògnia festival de sa retza at adotau is CAM, est a nai is "critèrius ambièntalis mìnimus" chi is sòtzius depint respetai. Intre custus critèrius agataus s'impreu de materialis eco-sustenìbilis, s'irminorigamentu de is consumus de is resursas naturalis, s'aberguada de is consumus de is energias. In prus, dògnia festival at a depi donai contu de is efetus ambièntalis e sotzialis prodùsius.

S'impignu de sa retza est de spainai valoris e ideas de importu comenti s'arrespetu po s'ambienti innoia biveus e sa sustenibilidadi.

Bisòngiat a nai ca "Jazz Takes The Green" est nàscia gràtzias a "I-Jazz", s'assòtziu italianu de is festival jazz, a sa "Fondazione Ecostistemi", chi batallat de sèmpiri po s'isvilupu sustenìbili, e a GreenFEST, una realidadi chi est nàscia finas gràtzias a "Time in Jazz". "Su birdi - at nau Paolo Fresu - depit essi su colori de su tempus nostu". E pretzisat puru ca s'impignu po sa sustenibilidadi ambièntali depit essi unu doveri e non feti unu diritu.

A.C.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22