Sa RES: unu progetu sustenìbili in is padentis de Sardigna
Terra - Est unu passixeddu ainnantis in nd'unu caminu longu e de importu mannu: su de s'avaloramentu turìsticu e de s'ambienti de su territòriu sardu. Un'idea chi tenit una bandera isceti: sa de donai vida a unu progetu sustenìbili.
Seus chistionendi de sa RES, est a nai de sa “Rete escursionistica della Sardegna”, una retza de caminus chi pagu mesis fait at otentu totus is permissus po fai diversas operatzionis in nd'unas cantus zonas des'ìsula.
Protagonista e ghia de is operatzionis etotu est s'”Agenzia Forestas” de sa Regione Autònoma de Sardigna, chi tenit s'impreu de curai is caminus chi s'agatant in is padentis.
Giai in s'artìculu 28 de sa sa Lei Regionali 16/2017 si chistionaiat de fai unu catàlogu de is caminus chi faint parti de sa RES. A custus s'aciungiant finas is RIS, chi funt is caminus de sa “Rete Ippoviaria della Sardegna”. Dògnia caminu de sa RES e de sa RIS s'at a sinnai cun nd'una eticheta. Aici, po fai un'esèmpiu iscèti, ddoi ant essi caminus de trekking, ma po finas caminus de fai in mountain bike.
Su dinai po portai su progetu a cumprimentu est arribbau de s'Europa e contat prus de cuatru milionis de eurus. Non mancant nimancu is agiudus, chi oi funt possibbilis po mori de una retza de cumbènius. Intre custus agataus: cussu firmau cun su “Club Alpino Italiano”, chi est ispertu in sa seguràntzia de is caminus; cussus cun is GAL e is comunus e cun is operadoris de su turismu ativu.
Po aprontai su progetu s'”Agenzia Forestas” depit pòniri in motu una retza de cuntatus chi mandant ainnantis unu traballu imbusticau, fatu de unus cantu momentus: s'analisi, s'arregorta de is datus e a s'acabbada is traballus. Po fai totu custu giaint una manu is CAI, prusatotu cussu de su Sud-Sardigna e cussu de sa Gaddura.
Su progetu est passau po finas atressu de su V.A.S. e in su mesi de austu 2020 sa “Direzione Generale dell'Ambiente” dd'at donau una valutatzioni positiva. Aici, sa RES est andendi ainnantis po sa realitzazioni cosa sua.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
