VAIcacao: su marcu amigu de s'ambienti
Terra - Sa Sardigna puru tenit una produtzioni de cacau e est una produtzioni sustenìbili. S'azienda chi traballat su sèmini de su cacau si lamat VAIcacao e est s'ùnica torrefatzioni de cacau in Sardigna.
Sa de VAIcacao est una realidadi interessanti chi traballat su cacau produidu in Ecuador a manera ètica e sustenìbili. Cussa ecuadoregna est una faina agrìcula e artesanali innovativa, chi valorizat sa bèndida direta. In prus, po coltivai su cacau non benint impitaus produtus chi impestant sa terra e nimancu concimi chìmicu. Po fai sèminis de calidadi s'impreant feti tènnicas agrìculas orgànicas.
VAIcacao est filla de un'idea de Elisa Parriciatu e Juan Rafael Trigueros e tenit domu in Terranoa.
Ma comenti traballant Elisa e Juan Rafael? Po primu cosa important su cacau deretu de is produtoris chi ddu traballant a manera artesana. Duncas, su cacau iscerau de is duus meris est sèmpiri unu produtu de calidadi, una matèria primàrgia sentzera chi tenit propriedadis bellas po sa saludi.
VAIcacao isboddiat sa faina sua cun amori e atentzioni manna po sa matèria primàrgia. Elisa e Juan Rafael iscint beni de chini pigant su sèmini, ma iscint puru comenti ddu betiri e comenti ddu traballai. Po podi ofèrriri unu produtu èticu e sustenìbili totu su traballu s'isboddiat cun incuru mannu. Si cumentzat de sa compora, si sighit cun su trasportu e s'acabbat cun sa trasformatzioni.
Is produtus VAIcacao funt vegan friendly, non tenint glutine, latòsiu e nimancu lecitina.
Ma comenti nascint is propostas VAIcacao? Agoa de ai turrau is fais si ndi bogat su tùvulu e si lìmpiant de s'iscorza. Est aici chi si fait su granu de su cacau. Custu sighit àteras traballaduras fintzas a si mudai in pasta. De sa pasta de cacau si fait su ciuculati. In sa retzeta insoru Elisa e Juan Rafael impreant feti tzùcuru biològicu e integrali e no aciungint àteru bùtiru de cacau, lecitina e edulcorantis.
No est totu. VAIcacao est marcu “ zero waste” e fait atentzioni a s'imboddicamini puru. Custu, difatis , est fatu cun materiali eco-friendly. Si podit nai ca seus a faci de unu marcu amigu de s'ambienti.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
