Protesta Ecotopia. A Manca: solidariedadi a traballadoris e istudiantis

(IlMinuto) - Casteddu, 16 de su mesi de làmpadas - Una giunta regionali chi narat de essi a difesa de su diritu a s'istùdiu e unu Presidenti, Francesco Pigliaru, chi in sa campagna eletorali passada, at fatu de s'annestru e de sa cultura su cuaddu de batalla suu. Epuru in Nùgoro is cosas no andant comenti iant a depi andai. Cida passada, difatis, sa primu tzitadi de sa Barbàgia est istètia mòvia de sa protesta de is traballadoris de sa cooperativa Ecotopia, sa, po si cumprendi, chi in Nùgoro ghiat is serbìtzius aintru de s'Universidadi. Su motivu? S'ausèntzia de is finatziamentus e de is istipendius de parti de sa Regioni. Espressat solidariedadi a is traballadoris e a is istudiantis nugoresus in protesta sa setzioni Paschedda Zau de a Manca pro s'Indipendèntzia: "Pentzaus ca sa situatzioni chi seus bivendi fatzat parti de unu progetu cuau - pretzisant is indipendentistas de manca - chi puntat a impoberai is tretus de aintru de sa Sardigna siat economicamenti siat de su parri sotziu -culturali agiudendi su 'spoplamento' lentu ma sighiu". No scéti debilitamentu de s'Universidadi poita sa denùntzia de a Manca fueddat puru de irminorigamentus a sebìtzius netzessàrius comenti postas, iscolas, ufìtzius e presidius sanitàrius. "Mancai totu - concluit sa scuadra indipendentista - si sighit a finatziai su fàbricu de casermas cun dinai pùblicu chi furiat de s'edilitzia iscolastica, comenti s'est bidendi cun su fàbricu de Pradu".