Sindrome de Cuirra: sa denúntzia de "Gettiamo le basi" lompit in Bruxelles

(IlMinuto) – Casteddu, 7 de su mesi de martzu - su tema de s'ocupatzioni militari de sa Sardigna lompit in su coru de s'Europa. Oi a Bruxelles, in sa domu de su Parlamentu europeu, est difatis in programa unu dibàtidu asuba de sa chistioni. Su Comitau "Gettiamo le basi" fueddat in su chistioni a is aprontadoris de sa cosa, a is parlamentaris europeus e a diversus assótzius de su Belgiu, atressu de unu documentu asuba de sa Sindrome de Cuirra . "Cuirra - si ligit in su documentu imbiau a Bruxelles - funt pagu domus de campagna acanta de su poligonu prus mannu de Europa, su Pisq. Su númeru imminoricau meda de is residentis at amostau beni su peschentu malu de leucemias e alteratzionis geneticas. Est po custa arrexoni chi in Sardigna de su 2001 si documentat e si denuntziat sa 'Sindrome de Cuirra', sa fórmula incluit sa genti degumada de is mantessi patologias, esposta a is belenus de is poligonus de Cabu Teulada, Cabu Frasca, e de s'ex basi nucleari US Navy de Sa Madalena". De s'annu passau, acrarat su Comitau, sa sindrome de Cuirra est a s'atentzioni de sa magistradura. "Tres generalis cumandantis de su Pisq - pretzisat 'Gettiamo le basi' in su scritu isterrinau in Bruxelles - funt atrassaus a giudítziu cun s'acusa de omicidiu multìplici voluntariu, destrossa ambientali e diversus àterus críminis […]. Seus lompius  a su coru de sa chistioni: s'incompatibilidadi in d-unu mantessi logu de is fainas de sa genti chi ddoi bivit cun is atividadis de gherra".