Tzerachia Militari: in arribu 12 milionis 794milla eurus de indennitzus

Ascurta custa nova

(S’úrtima nova) – Casteddu, 20 de su mesi de fiàrgiu – De su Stadu italianu arribant 12 milionis 794milla eurus de indennitzus po is tzerachias militaris. Ma cantu balit sa vida de una personi? E unu territóriu addagnau in modu grai de is esercitatzionis militaris ita balimentu tenit? Sa nova asuba de is indennitzus in faori de is regionis carrigadas de is avincus militaris est stétia annuntziada cida passada de su Presidenti de sa Regioni Sardigna Ugu Cappellacci a sa fini de su vertici romanu cun su Ministru de sa Difesa Giuannipaolu Di Paola. Is agiudus in arribu funt distinaus a su fàbricu de òperas públicas e de serbítzius sotzialis in is comunus chi funt stétius tocaus de prus de is abisóngius militaris.Ant a essi puru donaus 6milionis e 312milla eurus de indennitzus po is piscadoris. Su Presidenti Cappellacci narat de essi satisfau de is arrisurtaus otentus. "Sa Sardigna - afirmat Cappellacci - est un'Ísula chi in nòmini de s'interessu natzionali at sèmpiri fatu sa parti sua e chi gràtzias a custu s'abetat chi su Stadu fatzat sa própriu e chi ddoi siat un'interessu natzionali po sa Sardigna". E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda