Candu su Stadu "no respetat sa lei". In Casteddu e in Igrèsias is presonis isciopant

Ascurta custa nova

(S’úrtima nova) – Casteddu 28 de su mesi de fiàrgiu – In su presoni de Casteddu de mesi in mesi is contus andant de mali in peus. Si difatis a sa fini de su 2011 in Buoncaminu is presoneris furiant 187 in prus a petus de is postus letu, a sa fini de su mesi de gennàrgiu de su 2012 is personis inserradas in su presoni casteddaiu funt arribas a essi 204. A fai connosci is datus de s'aministratzioni est, comenti sèmpiri, s'assótziu Sotzialismu Diritus e Reformas. "Su presoni de Buoncaminu - si ligit in d-una nota de Sdr - no est a solu in custa classífica mala. A su costau ddoi est su de Igrèsias cun 50 presoneris in prus de is prevìdius de su regulamentu". Is istitutzionis funt duncas meda atesu de respetai sa capacidadi regulamentari in presonis de importu mannu comenti su de Casteddu - chi arretzetat 549 presoneris in totu - e Igrèsias, innoi ddoi funt inserradas 112 personis."Is númerus - cumentat sa presidenti de Sdr Caligaris - addolumannu fotografant una situatzioni dramàtica chi no podit essi prus mandada a innantis chentza chi su Stadu no atumbit in illegadidadis grais". E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda