Sindrome de Cuirra. Cao (Gettiamo le basi): “Su Guvernu no fueddat”. S’istória de P.F.: militari de leva in Teulada

(IlMinuto) – Casteddu, 15 de su mesi de cabudanni - "Nosu bidiaus is sordaus americanus cun is mascaras, is guantus e is tutas arregolli su croxu de is ballas in su Poligonu. Ddus pigaiaus po culu […], issus invecis scidiant ca is ballas teniat uraniu impoberau. Ddu scidiant". Est sìmbili a su contu de is àterus militaris cussu de Paolo Floris. In su 1998 fadiat su serbítziu de leva ("de nimancu ddu boliu fai su militari) in su Poligonu de Teulada e in su 2006 ddi fut dianniosticau su linfoma de Hodgkin. "A pustis de ai tentu diversas arrecaidas - acrarat a IlMinuto - in su 2008 apu fatu da arradiuterapia e imoi fatzu una bisita de cuntrollu dónnia ses mesis". Floris at pediu a su Poligonu de Teulada totu is scedas asuba de is armas impitadas in cussu tretu, po podi fai a su Ministeru de sa Difesa sa dimanda de pagamentu de is dannus. Ma de su Poligonu no est arribada niscina arrespusta. Po su datori chi curat a s'ómini s'acàpiu intre is fainas in su Poligonu e su tumori est craru. Is tempus funt cussus de sa maladia. Custu mangianu puru Floris at partitzipau a su sit in aprontau de su Comitau "Gettiamo le basi" e de s'assótziu familiaris in pratza de su Cramu in Casteddu. A duus mesis de su primu atopu a faci de s'Ofítziu de su Guvernu in Casteddu de Roma no est arribada a oi nisciuna arrespusta a sa dimanda de "beridadi e giustítzia". "Su Guvernu - acrarat Mariella Cao - abarrat citiu. In Sardìnnia si podit sighiri a impestai comenti mellus si creit e is militaris chi lompint a traballai in Sardìnnia podint crepai trancuillamenti". In su mangianude oi una delegatzioni at a atopai a s'assessori regionali de sa Sanidadi, Simona De Francisci, e unu grupu de consilleris regionalis.