Sindrome de Cuirra. Sa denúntzia de una fémina soldau a Vittimeuranio.com: "Traballu in su Poligonu intefortzas e tengu unu tumori"

(IlMinuto) – Casteddu, 29 de su mesi de austu - Un'àteru casu de tumori intre is militaris chi traballant in su Poligonu interfortzas de Foghesu. In is diris passadas una fémina de 28 annus, soldau cun s'incàrrigu de missilista, at denuntziau - cun d-una lítera mandada a su giassu Vittimeuranio.com – de ai scobertu de calencunu mesi de tenni unu cancru. "Seu in cura - scririt sa fémina - in s'ispidali ocològicu de Casteddu. Po duus annus e pagu prus apu fatu serbítziu in su Poligonu interfortzas de Foghesu, e no negu ca totus is datoris a sa scoberta de sa malàdia mia m'ant dimandau chi furiu stetia in cussus logus. Est aici, in cussus logus ddoi seu stetia e seu stetia puru in Teulada po is esercitatzioni, biu s'incàrrigu miu de missilista [...] apu sparau puru deu is 'nomenaus' missilis […]". "A sa luxi de totu custu - si ligit in sa lítera - imoi iat a bolli arrespustas. Iat a bolli sciri si sa malàdia mia est acapiada a su traballu chi fatzu e chi apu fatu"