Apuntamentus: in Biddaramosa imperat su gustu cun "Sapori dal mondo"

(IlMinuto) – Casteddu, 23 de su mes''e martzu - No ddoi est amori prus santzeru de cussu po sa cosa 'e papai", naràt George Bernard Shaw. Aici in Biddaramosa at essi su gustu de is culturas de "Sapori dal mondo" a fai de rei in sa diri de Sàbudu 2 de su mes''e Arbili. S'apuntamentu, chi at a cumentzai de is 18.00 in Bia Salvo d' Acquisto, est stetiu propostu e aprontau de s'Assótziu Culturali Sold-Out. Est una manifestada chi, arribbendi ocannu a sa tertza editzioni sua, est nàscia po avalorai e favorèssiri s'integratzioni de is immigraus chi bivint in Sardigna atressu de s'aparada de is pratus de sa coxina traditzionali de sa terra insoru. Aintru de sa diri s'at a tenni puru unu dibbàtidu, in custu - si ligit in d-una nota - "s'at a discuti [...] de s'integratzioni de is culturas diversas de sa sociedai nostra, de su galateu, de comenti si stait candu seus setzius a mesa, serbiri e papai pratus diversus de s'usu comunu". At essi puru possíbbili tastai is diversas pitàntzias paghendi unu "Mealticket" de 1 euru po natzioni, o de 10 eurus po totus is natzionis chi ant essi presentis.