Su 17 de cabudanni su "Serdiana Wine Festival"

In sa Mesa - Su nùmene suo est "Serdiana Wine Festival" e comente si podet cumprèndere est una manifestatzione dedicada a su binu. Faeddamus feti de binu de calidade arta, cussu produidu dae sas cantinas chi s'agatant in su territòriu de sa bidda de Serdiana e chi rapresentat su resurtu de su traballu fatu dae sas "Cantine Argiolas", dae s'azienda vitivinìcola "Audarya", dae sa "Cantina Pala" e dae s'azienda de "Antonella Corda". Totus etichetas famadas meda in su mundu de sa produtzione vitivinìcola.

S'atopu dedicadu a custa produtzione de sa massaria locale s'at a isboligare in su tzentru istòricu de Serdiana e est in programma pro sàbadu 17 de su mese de cabudanni.

Su pubblicu chi at a atobiare in sa bidda in provìntzia de Casteddu est cussu de sas ocasiones importantes. Sos espertos de binu, difatis, non bident s'ora chi arribit su 17 de su mese. Pro s'ocasione finas sa Pro loco serdianesa e s'asòtziu "Gocce di solidarietà" ant a aprontare tastos de màndigos tìpicos sardos chi ant a acumpangiare bene sas ampullas de sos binos. In programma peri sos labboratòrios organizados dae s' "Fondazione Italiana Sommelier".

In su tzentru istòricu de sa bidda s'at isboligare finas una mustra "Il vino nella Sardegna Nuragica", chi at a èssere organizada dae s'archeologa Giusi Gradoli. Sa mustra at a èssere finas s'ocasione pro permitere a unos cantos artistas (Paolo Pittiu, Alessandro Cossu, Alessandro Casula e Patrizia Cara) de fàghere connòschere sas òperas issoro.

Binos e tastos de sa coghina locale ant a èssere acumpangiados dae sa mùsica de sa Mogoro Marching Band, su grupu at a sonare in sos logos in ue s'at isboligare sa manifestatzione dedicada a sos binos de su territòriu. S'ispetaculu de mùsica at a sighire cun Gerardo Ferrara, Battista Dagnino e Tonino Macis, chi ant a ofèrrere unu tributu a Fabrizio De Andrè cun "In te Unde de Faber".

Su festival at a cumintzare dae su mangianu, dae sas bingias, cun sos "tour" de màndigos aprontados cun sos binos de Serdiana.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22