Naschet in Tàtari s'“Accademia sarda del lievito madre”

In sa Mesa - Un'innu a sa màdrighe. Cun sa punna de promotzionare custa cummassa ispetziale naschet in Tàtari s'"Accademia sarda del lievito madre".

Sa màdrighe rapresentat sa mama e su coro de unos cantos tipos de pane traditzionale e est una cumassa fata de podda e de abba e carchi bia finas de sale. Dae custos duos/tres ingredientes s'incarrerat s'idea de fàghere nàschere un'"Accademia sarda del lievito madre" de Tàtari.

S'"Accademia", chi est presèdida dae su microbiologu Giovanni Antonio Farris, at sa mira de istudiare, valorizare, promotzionare e divulgare custa cumassa antiga e sustenìbile, dae semper difusa meda in Sardigna.

Unu traballu importante, chi est ùtile a connòschere sa pràtica de sa sueta fata cun s'impreu de sa màdrighe. Faeddamus de una cultura antiga, chi - comente acrarat s'espertu - printzìpiat a su mancu a 4/5milla annos a.C..

"Sa Sardigna est su logu chi at prus panes tìpicos in totu su mundu. Pro mèdiu de s'impreu de sa màdrighe su pane isvilupat caraterìsticas ùnicas; sos produtos ant duncas sas propiedades de sas farras e de sa sas cumassas, custu massimamente cando si faeddat de produtos fatos cun su trigu de su territòriu". Comente sutalìneat Farris, custas caraterìsticas dant benefìtzios sensoriales e nutritzionales e faghent finas bene a sa salude.

Tocat a sutalineare ca sa traballadura cun sa màdrighe at bisòngiu de unu nùmeru de oras prus mannu pro s'ammatricadura, ma est pròpiu su protzessu istentosu su chi favoresset sa produtzione de unu nùmeru mannu meda de batèrios de su late chi agiudant a digirire mègius.

S'idea est divènnida realidade in su 2021 cun s'acumprida de sa faina, in intro de sa "Collezione Microbica del Dipartimento di Agraria" de s'Universidade de Tàtari, in su cumpartu de sas "Paste Acide della Sardegna". Inoghe sunt costoidas màdrighes chi lompent de ogni cugione de Sardigna. Semus faeddende de màdrighes passadas de una generatzione a s'àtera pro unu tempus superiore a 100 annos.