Violèntzia contra a sas fèminas, in Loceri una panchina e una targa

Inaugurende unu de sos sìmbulos contra a sa violèntzia maschilista, su Comunu de Loceri punnat a s’educatzione e a su rispetu. In pratza de su munitzìpiu como b’at una panchina pro chi s’ammentu de custa batalla non si nch’isperdat. In pare cun issa finas una targa. Sa faina, òpera de sos pitzocos de sa segundària de primu gradu de sa bidda in intro de su laboratòriu “Nemos m’est mere”, naschet dae sa collaboratzione intre su cumprensivu “Emilia Pischedda” de Barì, s’isportellu de sa limba sarda de Loceri, su giai mentovadu Comunu de Loceri cun sas amministratziones de Lanusè, Barì e Cardedu. «Sa violèntzia contra a sas fèminas – at naradu su sìndigu de Loceri Gianfranco Lecca – est una ferta non pro chie la retzit ebbia ma pro totu sa comunidade. Cada paràula e cada atzione de sensibilizatzione est unu tassellu pro su fràigu de una sotziedade prus giusta».