Gigi Riva, su Cagliari festat sos 80 annos de su campione eternu

«Oe est cudda die chi, una bia de prus, nos firmamus castiende a chelu. Che chi esseremus chirchende unu sinnu pro agatare cuddos tzinnos seguros de sa manu e de sa conca chi Gigi Riva ti donaiat rugrende sas carreras de sa tzitade nostra». Sa sotziedade de su Cagliari est gasi chi oe “festat” «su primu cumpleannu» suo a pustis de sa dispedida. Agiunghende chi «mai, comente in custu casu, li deghet a faeddare de presèntzia totale. In s'esèmpiu, in sos ammentos, in sos nùmeros, in su bentu chi carignat sas costas de s'amada terra de adotzione». Unu comunicadu longu pro ammentare unu sìmbulu de Casteddu e de sa Sardigna intrea e chi podimus lèghere pro intreu in su situ ufitziale de sa sotziedade ruju-biaita de fùbalu. «Oe – custos sos concruos de sa nota – su de sos otanta annos suos, tzelebramus cussu òmine chi at fatu innamorare generatziones intreas. Gràtzias, Gigi. In eternu».