«Resistèntzia si narat!». S'assemblea de sos istudiantes pro sa Palestina su 12 in Tàtari

«No li nargiais terrorismu ma impreade su nùmene suo: Resistèntzia». Est de custa manera chi is de s’Assemblea de sos istudiantes pro sa Palestina sunt cunvochende pro sàbadu su 12 (dae sas 5 de merie in Tàtari, dae pratza de Itàlia a sa de Fiume) una manifestatzione pro mustrare sustegnu e solidariedade a unu pòpulu «chi est resistende dae 365 dies e 76 annos». Ma fintzas contra a «s’impunidade de Israele». Denuntziada fintzas sa «repressione aprontada dae su guvernu Meloni»: «Su chi est acontèssidu in Roma su 5 de santugaine est una birgòngia antidemocràtica. E repressione nd’ant fatu fintzas in Casteddu in ue ant proadu a impedire unu corteu. In Tàtari nos ant impedidu de manifestare de cale si siat manera su 7 imponende·nos comente prima data a disponimentu su 12. Ma non nos ant a pònnere timòria, sa repressione issoro non podet firmare sa resistèntzia palestinesa e libanesa».