Locos de Cultura, su 2 de santugaine sa presentatzione de sa segunda editzione de su progetu

Acumprida sa segunda editzione de Locos de Cultura, progetu de valorizatzione in limba sarda a ghisa de contu de biàgiu peri noe biddas chi dae su 2008 sunt parte de s’Unione de sos Comunes de su Monte Arvu: Bitzi, Lodè, Lùvula, Onanie, Orune, Osidde, Pasada, Thiniscole e Torpè. In custa chirca noa sos logos contados (in brochure e vìdeu) sunt su museu de sa Tziviltade pastorale e massajina de Bitzi, sas domus de janas de “Janna Oriavula” de Lodè, sa crèsia de sos Ànzelos de Lùvula, su santuàriu Santu Bachis de Onanie, sa crèsia de Santa Maria de Orune, sa tumba de sos gigantes de “Sa Raighina” de Osidde, sa turre de Santu Giuanne de Pasada, sa tumba de sos gigantes de “Su Picante” de Thiniscole e su Museu tzìvicu de Torpè. Su materiale multimediale lu podimus bìdere in su situ locosdecultura.it e in s’apuntamentu de su 2 de santugaine a sas 5 de sero in sa sala de s’Unione de sos Comunes de su Montearvu in Thiniscole. Ant a faeddare sos traballadores de s’Àrea amministrativa de s’Unione, s’operadora audiovisiva Silvia Punzo, su fotògrafu Alex Cucchi e sa giornalista Mariantonietta Piga autora de sos testos.