Dae su 9 a su 13 su Salone de su libru de Torinu. Sa Sardigna cun sas "Visiones" suas

Cun su tema “Vida immaginària”, chi movet dae su pensu de s’iscritora Natalia Ginzburg, torrat su Salone de su Libru de Torinu cun atividades dae su 9 a su 13 de custu mese. B’at a pigare parte finamentas sa Sardigna, cun unu programma in continuidade cun su tema seberadu. «Est dae sa vida immaginària – leghimus in su situ de sa RaS – chi si produint, chi si ànimant e chi essint a campu sas “Visiones” de un’esistèntzia arraighinada in s’istòria de su tempus coladu e de sa cuntemporaneidade pro chi b’apat unu benidore. Visiones arraighinadas sighende sos esèmpios de fèminas e òmines de custa terra». In sos ispàtzios sardos de su Salone s’ant a intreverare addòbios cun sos autores, editores, personalidades de su mundu de sa cultura e laboratòrios pro pitzinnos. Intre sos eventos cherent ammentados: "Ricordatemi come vi pare" dedicadu a Michela Murgia (su 10 a mesudie); s’atopu archeològicu in ammentu de Ernico Atzeni (semper su 10 ma a sas 5,30 de merie) cun s'archeòloga de s'Universidade de Casteddu Giuseppa Tanda chi at a presentare, ufitzializende·la, sa candidadura a s'UNESCO de sas Domus de Janas; s’eventu cun su giornalista Luca Telese (su 12 a mesudie) ammentende a Gigi Riva e intituladu "Un Rombo di Tuono dal Cielo"; s’apuntamentu cun su chircadore de s’Universisade de Casteddu Duilio CaocciI(su 13 a sas 11.30) ammentende a Maria Giacobbe.