Tumores de sa pedde, ambulatòriu nou in Nùgoro sena isetu

A pustis de unu chi est ativu dae carchi mese in su Padiglione B de su Zonchello, s’Asl nugoresa at annuntziadu chi in ghennàrgiu ant a abèrrere unu segundu ambulatòriu de dermatologia oncològica in sa Domo de comunidade de carrera de Demurtas sena listas de isetu. Nova de importu pro sos patzientes cun suspetu de melanoma, epitelioma e tumores de sa pedde. Corsia preferentziale, duncas, pro sos chi no ant tempus de pèrdere in ue su tempus est prus chi non determinante. Tocat de cumprèndere si custas medidas ant a a abassare sos tempos de isetu pro sas bìsitas dermatològicas (listas malas a las agatare in sos sitos de sa sanidade sarda, custa est de ghennàrgiu) chi pro su chi pertocat sas diferìbiles e programmàbiles est possìbile chi bàrighent su lìmite chi est de 30 dies pro sas primas e de 120 pro sas segundas.