Presentadu s'Ufìtziu limba sarda in Tortolì

Eris, in sa biblioteca comunale de Tortolì, ant presentadu sas atividades de s'Ufìtziu Limba Sarda, finantziadu cun fundos de sa Lege 482/99 e de sa Lege Regionale 22/2018.

Sa Sala de is Cunvegnos de sa Biblioteca Comunale fiat prena de gente in ocasione de custu importante eventu, chi at bidu sa partetzipatzione ativa de sa comunidade locale.

Ant abertu s'atopu is launeddas sonadas dae Alessandro Podda de Loceri. A pustis at pigadu su faeddu s'assessore de sa Cultura, Rita Cocco, pro donare is saludos istitutzionales e fintzas pro acrarire is resones chi ant ispintu sa giunta a istituire su servìtziu linguìsticu. Su sèberu, at sutaliniadu s'assessore, «non si basat subra motivatziones de caràtere identitàriu e culturale ebbia, ma agatat fundamentu fintzas in resones econòmicas e in sa promotzione territoriale e turìstica. Sa limba sarda, comente su catalanu in Catalugna, est cunsiderada unu motore de s'economia e unu fatore de isvilupu». S'operadore linguìsticu Ivan Marongiu at aprofundidu su tema de s'amparu de sa limba sarda e de su protzessu de istandardizatzione acontèssidu dae su 2006 gràtzias a sa creatzione de sa LSC (Limba Sarda Comuna) e a is normas ortogràficas regionales. Durante s'espositzione sua, Marongiu at elencadu is diversas initziativas prevìdidas in su cuntestu de su progetu "Tortolì, genna de s'Ogliastra", comente s'Isportellu linguìsticu, sa Formatzione, sas Fainas culturales e sa Toponomàstica. A concruos de s’atopu, su pùblicu presente at tentu s'oportunidade de intervènnere, espressende opiniones e proponende ideas pro sa valorizatzione de sa limba sarda, prus che totu in is cuntestos pùblicos e familiares.

Sa partetzipatzione ativa de sa comunidade at evidentziadu s'importu e s'interessu pro s'initziativa, consolidende s'impinnu colletivu pro sa tutela e sa promotzione de s’identidade linguìstica e culturale de sa Sardigna.

m.p.