Chimbe fèminas binchent sa "Foglia d'olio" pro s'ògiu issoro

Aprofundimentu de su chenàbura - Chimbe fèminas binchent su prèmiu ""Foglia d'olio" pro s'ògiu issoro. Ant a èssere premiadas cun sa "Foglia d'olio 2023" in su "Galà dell'olio", su fèstival chi afestat a s'ògiu ermanu e a sos produtores mègius. Su "Galà dell'olio" s'at a isbòligare in Bitonto (Bari) dae su 16 a su 18 de su mese de cabudanni.

Tra sas chimbe fèminas b'at finas un'imprendidora sarda Antonella Orrù de s'"azienda agricola Treslizor", un'azienda chi at 1000 matas de olia pagu prus o mancu. Faeddamus de matas pro su prus seculares chi s'agatant in su territòriu tra Massama e Aristanis

A fàghere cumpangia a Antonella Orrù bi sunt Maria Rosa Arbore de s'"azienda agricola Lamacupa" de Corato in Puglia, Carmen Bonfante de s'"azienda agricola Evo Sicily" de Menfi in Sitzìlia e Monica Vaccarella de s'"Azienda vèneta Domma Emme".

Sa "Foglia d'olio 2023" at a èssere cunsignada lunis 18 de su mese de cabudanni. A lu annuntziare sunt istados su Presidente de sa Regione Pullia, Michele Emiliano, s'assessore de s'Agricultura de sa Regione Pullia, Donato Pentassuglia, su sìndigu de Bitonto Francesco Paolo Ricci e su babbu de sa manifestatzione, su "chef" de s'ògiu Emanuele Natalizio.

Ma bidimus dae curtzu ite est su prèmiu "Foglia d'olio". Su prèmiu "Foglia d'olio" est unu reconnoschimentu assignadu dae s'assòtziu "Foglia d'Olio", in collaboratzione cun s'assòtziu natzionale "Città dell'Olio" e cun sos assòtzios de espertos prus importantes de su setore de sa produtzione de s'ògiu ermanu, est a nàrrere: "Airo", "Flos Olei", "Evoluzione" e "Premio Il Magnifico".

Su "Galà dell'olio" no interessat feti s'ògiu. Difatis, dae su 16 a su 18 de su mese de cabudanni su tzentru istòricu de sa tzitade pulliesa at a acasagiare peri unos cantos artistas. Tra sos nùmenes prus famados, su de su regista Riky Tognazzi, su de s'atore Giammarco Tognazzi e su de su musitzista Alessandro Quarta.