12 avios torrant a Biddesatu

Aprofundimentu de su chenàbura - Gràtzias a su progetu de s'Universidade de sos Istudios de Tàtari "Life Safe For Vultures", a pustis de sas curas, 12 avios torrant a Biddesatu. S'iscopu est su de torrare a abitare unu territòriu dae ue fartant dae meda tempus.

Primu de sighire su contu, chi at comente protagonista custos 12 avios, devimus pretzisare ca s'aviu est unu pugione chi in su tempus coladu fiat una ratza difusa in unas cantas zonas de Sardigna. A dolu mannu oe in s'ìsula s'aviu est presente cun 130 pugiones pagu prus o mancu. Sos pugiones in chistione sunt localizados in sos territòrios de Bosa e de s'Alighera. Custos avios, però, s'agatant in un'istadu de cunservatzione crìticu. Dae inoghe s'importàntzia manna de su progetu "Life safe for vultures".

Sos 12 avios in chistione sunt pugiones arribados dae s'Ispagna. Pro unu tempus de ultres duos meses custos pugiones sunt istados acasagiados dae s'"Agenzia Forestas" in su tzentru de recùperu animales arestes de Bonassai, in Tàtari. In custu tzentru est istada esecutada sa compidada sanitària issoro.

Cando sunt arribados, custos animales fiant giai destinados a sa comuna de Biddesatu, una bidda chi s'agatat in sa regione de su Gerrei.

Est gosi ca sos avios torrant a abitare su territòriu. Sos pugiones tramudados a Biddesatu, lu acraramus, faghent parte de su primu nùcleu de pugiones destinados a s'intregu. Intregu chi est prevìdidu pro s'atòngiu imbeniente.

S'atzione ghiada dae s'"Agenzia Forestas", lu sutalineamus, s'introduit in intro de sas atividades de su progetu "Life Safe For Vultures". Unu progetu, custu puru, de s'Universidade de sos Istudios de Tàtari.

"Life Safe For Vultures" est finantziadu in su cuntestu de su "Programma per l'ambiente e l'azione per il clima". Su programma at s'obietivu de assegurare sa subravivèntzia de s'aviu in Sardigna pro tempus meda.