Locos de cultura. In lìnia sas galanias de sos paesàgios de s'Unione de sos Comunes de su Monte Arvu

Est in lìnia su situ web locosdecultura.it. Locos de Cultura est unu progetu de valorizatzione in limba sarda a ghisa de contu de biàgiu peri noe biddas chi dae su 2008 sunt parte de s’Unione de sos Comunes de su Monte Arvu: Bitzi, Lodè, Lùvula, Onanie, Orune, Osidde, Pasada, Thiniscole e Torpè.

Una bia intrados a su situ est possìbile a abbaidare sos vìdeos de 9 logos: su bidditzolu nuràgicu de Romanzesu in Bitzi; su logu de devotzione antigu de sa Purìssima in Lodè; su santuàriu de Santu Frantziscu de Lùvula cun sas duas festas suas de fide comunitària; sa crèsia de Santu Pretu de Onanie, prenda minuda de architetura romànica; su situ misteriosu de Sant’Efis in Orune; sos tretos de S’Iscopalzu in Osidde cun su nuraghe in cue imponente; su Casteddu de sa Fae cun s’ammaju suo in Pasada; sa turre de bàrdia seculare e mai istraca de Santa Luchia de Thiniscole; su nuraghe Santu Pedru de Torpè, bastione imponente e marcu ingeniosu de sa gente antiga. Dae su situ est possìbile a iscarrigare finamentas sa brossura.