In Sarule si tramandat s'arte antiga su tessìngiu

Aprofundimentu de su mèrcuris - In Sarule si tramandat s'arte antiga de su tessìngiu. In sa bidda in provìntzia de Nùgoro, difatis, leat pee sa valorizatzione de su tapete tìpicu cun cursos a tema.

Est gosi, ca su tapete de Sarule est su protagonista de unu progetu de valorizatzione fìgio de sa Comuna.

Sìmbulu de sa bidda, su tapete sarulesu est finas un'elementu de "design" estremadu. No est pro nudda ca at dadu vida a s'idea de fàghere unu cursu de tessìngiu chi lu at comente protagonista.

Su cursu de tessìngiu pro sos sarulesos est unu cursu de 150 oras e incumentzat su 6 de su mese de freàrgiu de su 2023, cun sa punna costoire un'arte antiga chi est finas figura de sa bidda. No est acabbada inoghe, sa punna est finas sa de intzentivare s'isvilupu de un'impresa sustenibile noa.

In su cursu s'ant a imparare sas tècnicas de su telàrgiu de Sarule, sas matessi tècnicas chi dant vida a su tapete sarulesu, chi previdit siat s'impreu de sa lana de berbeghe, siat s'impreu de s'ordidu.

Su tapete de Sarule, creadu cun unu disignu a diagonale, s'issèberat pro àere comente disignos su càlighe, sa rosa, sos pugioneddos e sas menduleddas. No est totu, custu tapete tìpicu si faghet notare peri pro colores allutos, tra custos prevalessent su grogu e su nieddu, ma b'at logu finas pro su ruju, pro s'asulu, pro su birde, su rosa e su castàngiu.

Fìgios de duas ànimas, sos tapetes e sos aratzos de Sarule ant comente costante issoro s'ànima traditzionale, est a nàrrere su disignu tìpicu de sa bidda, e peri s'ànima contemporànea, chi s'ispirat a su "designer" tataresu Eugenio Tavolara. Duncas, a fàghere dae mere sunt finas rombos mannos meda, rigas e isteddos.

Su traballu a telàrgiu de Sarule est sa sìntesi de innovatzione e traditzione, est a nàrrere ca rapresentat un'evolutzione de sas formas de sa traditzione.
Biu ca su materiale est bellu meda, sa Comuna at leadu su determinu de valorizare su traballu a telàrgiu e de lu afortire peri pro mèdiu de un'àteru progetu parallelu batijadu "Tempo Artigiano".

"Tempo Artigiano" est un'idea isvilupada paris cun su "designer" Giulio Iacchetti e sa "Fondazione Nivola" .