Binos durches, sessione noa de su Concours Mondial de Bruxelles

In sa Mesa - B’at tempus finas a cras, sàbadu su 13 de austu, pro si marcare a sa sessione de su Concours Mondial de Bruxelles dedicada a sos binos durches, afortiados e ossidativos in programma dae su 20 a su 23 de cabudanni in Marsala, in Sitzìlia.

Sa setzione galu aberta pertocat, sena distintzione peruna, totus sos binos durches (semidurches, durches e pabassados), sos licorosos e afortiados cun cale si siat dosàgiu tzucarosu o colore, prontos pro èssere valutados dae una giuria de espertos. E ant a èssere 50 sos giùighes internatzionales ospitados in una intre sas prus nòdidas regiones vitìculas de sa grandu ìsula mediterrànea, est a nàrrere su logu de s’omònimu binu licorosu.

«Sa punna de su Concours Mondial de Bruxelles – narant sos organizadores – est sa de ofèrrere a sos consumadores una garantzia isseberende·lis binos de vàllia, tastos meros e sìncheros cròmpidos dae sos 4 cugiones de su mundu».

Una vetrina dèghida, duncas, finamentas pro sos binos sardos e pro sos produtores disigiosos de nche brincare mares e cussòrgias pro fàghere connòschere sos netares issoro. Binos sardos chi otengeint 18 medàllias su maju coladu pro sa setziones Rujos e arbos e Rosé. Duas de oro (Noras 2018 e Muristellu 2013) e 16 de prata: (Rocca Rubia Riserva 2019, Punta Rosa 2020, Alikante 2017, D53 2018, Su'orma 2019, Fattorie Isola 2019, Naramae 2018, Noriolo 2018, Animas 2020, Carros Nepente 2018, Arvali 2021, Sileno Riserva 2018, Fòla 2019, Diorvene 2020, Lyta Corona Ruia 2020, Carignano La Giara 2020).

«Custos trinta annos de esperièntzia – sighint sos organizadores de su Concours – nos ant permìtidu de nos propònnere che a riferimentu de importu intre sas cumpetitziones enològicas internatzionales». In prus de sas traditzionales medàllias de oro e de prata at a èssere assignadu unu trofeu ispetziale in sas categorias semi-sicu, licorosu arbu, durche ruju, licorosu, afortiadu arbu, afortiadu ruju.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22