Cosa de papai fata cun sa spirulina: un'azienda sarda si movit in mercaus istràngius

Terra - S'azienda sarda “Livegreen” lompit in s'Expo di Dubai e ddu fait gràtzias a una campagna de “equity crowdfunding” chi si podit agatai in “CrowdFundMe, sa praforma cuotada in “Piazza Affari”. In diri de oi, difatis, “Livegreen” s'agatat in Dubai cun nd'unu impiantu de produtzioni cuncodrau aintru de su “Padiglione Italia”.

Ma ita fait connòsciri sa “Livegreen” a totu su mundu chi s'incarat in s'Expò de Dubai? Sa respusta est meda simpli: sa “Livergreen” fait connòsciri s'ispetzialidadi cosa sua, est a nai sa spirulina, una pallamarini impreada in coxina comenti “superfood” e impitada po fai trucus puru.

S'arregorta de dinai s'at a conclùiri in su mesi de gennàrgiu 2022 e tenit sa punna de lòmpiri finas a 200mila eurus.

Su dinai regortu at èssiri impreau po comporai atretzaduras e sistemas po fai crèsciri sa produtzioni de estratus proteicus e po fai puru amenguai is spesas chi custa realidadi depit sustèniri po su  “marketing” e sa comunicatzioni e po finas po sa circa, s'isvilupu e su reclutamentu de biòlogus, chìmicus e ingegneris. E ancora, su dinai at a serbiri po afortiai is bendidas, prusatotu atressu de un'“e-commerce”, e po podi aprontai un'oferta de consulèntzia e serbìtzius in su fàbricu de impiantus impitaus po arai is micropallamarinis.

Cun su brand cosa sua sa “Livegreen” bendit un'iaxi de produtus. Intre custus agataus: sa pasta, is “vegburger” e àteras licàntzias. Ma no est totu. Imoi, difatis, custa realidadi chi pentzat a s'ambienti e a sa sustenibilidai fait un'àtera iscùmissa puru e traballat sa spiriluna.

Sa proteina arada de sa Livegreen, bisòngiat a ddu sutalineai, no ispaciat àcua, no ispaciat iscra, non ndi bogat gas serra e ndi liat CO2 meda de prus de is matas.

S'azienda “Livergreen” est una sotziedadi agrìcula chi tenit domu in Aristanis; sa produtzioni sua si fait Campidanu, prusetotu in is sartus de Arborea.