S'istàtua de Carlo Felice e is consilleras Scarfò e Mulas

Fait chistionai sa motzioni de sa consillera sardista Antonella Scarfò asuba de s'istàtua de Carlo Felice. Sa motzioni pedit a su sìndigu Paolo Truzzu e a sa Giunta casteddaja de pònniri targas iscritas in diversas lìnguas asuta de s'istàtua de Carlo Felice. Is targas iant a dèpiri acrarai chini fiat custu tirannu. Sa consillera de su Psd'Az non pedit de ndi liai s'istàtua: ant èssiri is sardus a "pediri de ndi liai cussu sìmbulu" agoa de ai lìgiu sa beridadi asuba de su Visurè. Non est totu: in sa motzioni si pedit puru de dedicai un'istrada a 28 de arbili de su 1794 (Die de sa Sardigna).

Carlo Felice espressat beni sa soti chi est tocada a sa Sardigna de sa sarda Rivolutzioni a oi. Mancai s'istòria siat làdina e non lassit duda peruna asuba de sa figura de su tirannu, in is aposentus de palatzu Bacaredda ddoi at chini dda pentzat a manera difarenti. A arrespùndiri a sa consillera sardista est sa consillera de is Progressistas Francesca Mulas, chi afirmat ca is premissas istoriogràficas de sa motzioni sardista "funt dèbbilis meda". Po sa Mulas sa motzioni si fundat asuba de "cunsidèrius chi non tenit nisciunu acàpiu cun sa beridadi istòrica".

Non trigant a lòmpiri is reatzionis de su mundu indipendentista. A intrai in sa dibbata est su TzdA ProgReS-Casteddu, chi iat a bolli cumprèndiri ita rapresentant is Savoia po is progressistas sardus. Difatis, po su TzdA ProgReS-Casteddu "Sa ponidura de targas incraritivas iat èssiri unu primu passu a bia a sa connoscèntzia de s'istòria de Carlo Felice e de su chi at rapresentau po is sardus: po is ativistas de Progetu Repùblica custa iat a podi essi sa primu mòvida po lòmpiri a sa scotzadura de su monumentu e - si ligit in su comunicau - “in su mantessi tempus iat a podi èssiri po finas sa leva po ndi liai [...] totus is bias dedicadas a is Savoia".

Fotografia pigada de Flick (Ph: Giovannni)