Unu mundu prus bellu innoia bìviri: sa punna de Sardinia Cannabis

Terra - Si lamat Sardinia Cannabis, tenit sa domu sua in Tàtari e est un'assòtziu fatu de personis chi coltivant sa Canapa Sativa, est a nai su cànnabu.

Seus fueddendi de un'assòtziu culturali chi est in su primu postu po s'isvilupu umanu sustenìbili, est no profit, duncas non tenit sa punna de su profetu, e atressu de is fainas suas traballat po mandai ainnantis un'idea de produtzioni e traballadura de su cànnabu a manera ètica in Sardigna.

Su traballu de Sardinia Cannabis at cojau sa filosofia de sa Permacultura (una manera responsàbili e sustenìbili de bìviri arrespetendi sa natura e su territòriu e avalorendi sa biodiversidadi) e po custu tenit s'obietivu de donai vida a un'ecosistema forti e frimu.

Ma, a manera cuncreta, ita fait Sardinia Cannabis? S'assòtziu promovit s'agiudu intre chini coltivat su cànnabau e chini ddu traballat; aprontat atòbius culturalis e artìsticus po fàiri connòsciri is oportunidadis chi creat sa Canapa Sativa; donat sèminis tzertificaus a is professioneris e a is chi olint isperimentai protocollus de coltivatzioni chi podint diventai Open Data criendi diaici unu vantàgiu mannu po chini olit intrai in su mundu de su cànnabu sustenìbili.

Non est acabbada innoi. Sardinia Cannabis traballat puru in su campu de sa formatzioni. Ddu fait atressu de seminàrius. In prus de totu donat vida puru a partnership cun àterus produtoris. Seus fueddendi de is chi traballant in su cumpartu de sa cosa de papai, de sa bioledilìtzia, de is energias rennovàbilis, de sa zootènnica e de s'agronomia, de is curas alternativas e de is produtus po sa bellesa.

S'Assòtziu de sa nàscida sua s'est acollau s'impinniu de fàiri connòsciri a sa genti totu su chi de bonu ndi betit sa coltivatzioni de su cànnabu. Un'erba coltivada e valorizada in su tempus colau, chi oi podit torrai a donai traballu a is disimperaus e chi ndi podit creai po is giòvanus. Un'erba de importu mannu, duncas, chi torrat a donai vida a is terras chi funt in abbandonu, impreada po bonificai su satu de is produtus chìmicus chi dd'ant impestau. Un'erba amiga de s'ambienti e de s'òmini puru, sendu alleada de sa saludi de sa carena e de sa conca.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22